2011年9月1日 星期四

窮人數資產

跟秘書姐姐講理財, 止凡話富人跟窮人最大的分別就是資產及負債的比重, 先解釋了資產及負債的定義, 我是用富爸爸窮爸爸書中的定義 (不是會計學的定義), 資產就是會把錢放進你口袋的東西, 負債就是把錢從你口袋拿走的東西。


簡單易明, 然後我說富人所買的多是有好回報的, 有價值的, 多是資產, 而窮人就相反, 專買負債。她說, 「我無負債, 因為無買樓」

我就話「唔係得樓先可以叫負債, 有時樓又可以係資產又可以係負債, 講負債, 咁你個iphone呢?」

佢問「iphone都唔會攞走我d錢...」

我話「咁你個3G plan都唔少野, 加上成5千蚊買部iphone返黎, 玩三四年就點都要換過啦, 如果計折舊, 機身一年都唔見千幾蚊, 3G plan又三舊水一個月, 你咪為呢部野個個月用成五舊水, 佢帶俾你個回報有無咁高? 或者係你好需要佢?」

佢話「我需要佢囉」

我話「咪係囉, 用iphone無問題, 但係要知道呢d係消耗品, 甚至叫做你既負債, 除非部iphone幫你賺到好多錢, 如果唔係佢並唔係一種資產, 你要知道你享受緊一件乜野先得」

佢話「咁又係, 咁我認真數下有乜負債先, 屋企上網費啦, 老公架車啦, 租屋啦...」

我話「衣食住行呢d野唔洗計啦, 富人窮人都要用, 當然多數富人消費慾無窮人咁大咁啦, 唔知點解窮人特別講享受, 富人反而好儉樸, 數呢d負債無意思, 睇唔到好大分別, 不如你數數你d資產俾我聽?」

佢話「要每個月有錢俾我? 我份工囉...」

我問「係呀, 當係啦, 仲有無?」

佢話「......無lu, 真係無lu......係喎, 真係無喎, 原來我除左份工真係無資產喎!」

大家都不妨數數資產, 如果發現自己除了工作收入以外數不出資產來, 小心手停口停, 你離財務自由還有很遠路。

沒有留言:

張貼留言