2023年2月25日星期六

隱世財自人 3年賺600倍

早前曾在Blog內分享過一位網友(AC兄)的經歷,談論他近3年來的投資成績,由1萬美元開始,第一年就賺得30萬美元,三年共賺得600萬美元,過程並非透過炒賣Bitcoin之類的產品。今天已經財務自由的他,約小弟食過便飯,分享投資與生活,我把部分交流內容寫了兩篇文章,引來不少討論。


AC兄的投資主要集中於短炒美國科技股,他的投資方法大概是利用一些數據,試圖早於業績前,預計公司的業績是否符合市場預期,如果早早得知有落差,他就買入或沽空,待業績公布之後,若方向與他預計一致,就能獲利離場。

AC兄留意的重要數據主要是公司人手安排,業績公布前,其實公司內部的高管早已知道業績如何,亦有意無意地於公司的人手安排上反映出來。如果公司賺到錢,自然會請人,公司蝕錢的話,不請人還不止,隨時更會炒人。

透過類似的數據去窺視公司的業績,如此簡單的理念,市場都未必會注意得到。當然,這只是極度簡化了AC兄的操作,因為據他所言,他與三位拍檔一起把不同公司的大量數據輸入電腦作分析,絕不是單一個數字定生死。而且,他們各自各買賣的回報相距甚遠,相信當中還有不少投資操作、心理、背景影響了結果吧。

及後,我與另外兩位iM專欄作家鍾兄及百樂兄一聚,當晚他們對AC兄的故事十分感興趣,提出了不少問題與質疑,主因是這個回報實在太嚇人,令人難以置信。經我解釋後,基本上他們大概明白AC兄的投資操作,但他們仍不敢相信散戶可找到這樣一些小聰明而能勝過整個市場。

由於百樂兄都是矽谷人,對美國科技公司的運作也相當認識,他認為不容易於業績前可洞察到公司在人手方面的舉動。例如美國公司要炒人的話都頗麻煩,所以多會在業績公布後才出手,這樣就可以借不理想的業績作為炒人的借口。因此,要於業績前透過公司的人手安排去預測公司業績,他認為可能性不大。

反而百樂兄擔心有否一些沒有提及的內容,例如涉及內幕交易之類。當晚他就分享了一位女士,她是前美國科技公司高層,辭職後自己出來投資,成績厲害到不得了,每次都是公司業績公布前買入,公布業績後獲利就離場。因為回報太厲害,引起美國證監會的注意,就於她買機票準備離開美國之日拘捕了她。

原來該女子與不少美國科技公司高層混熟,不時得到內幕消息,她就是利用這些消息作投資。美國證監認為這是內幕消息買賣行為,所以作出調查與拘捕。

鍾兄就提出巴菲特初時的投資回報,還記得他由1957年至1969年期間,由10.5萬美元開始,增至2,600萬美元,12年回報大約250倍,AC兄前3年已經600倍,往後什麼也不幹也輕鬆超越股神了,實在誇張。怎說也好,當晚百樂兄與鍾兄仍有不少質疑。

投資方法多的是,條條大路通羅馬,這些年我聽過的賺錢故事多得很,不少離地得嚇壞人。今次AC兄這個故事,我親身與他交談,感覺他是一位好爸爸、好先生,上了岸,隱世財自人,悶悶地找我出來閒談一下而已。或者其故事實在太傳奇,又被我寫文發表了,因而被質疑,希望他別見怪。

文章連結:imoney

相關影片:

https://www.patreon.com/posts/3nian-600bei-zuo-68057939


13 則留言:

  1. 如果3年真係可以賺600倍 (由1萬美金賺到600萬美金)。
    咁6年就可以賺到360 000倍 (即係由1萬美金賺到36億美金
    9年即賺到216 000 000倍, (即係由1萬美金賺到21600億美金。

    現時世界首富嘅總資產先得2000億美金, 如果真係可以3年賺到600倍, 咁唔使9年就可以成為世界首富。

    就算後期資產太大令回報率下降, 相信10年內最少都可以上到香港富豪榜, 但依家富豪榜都見唔到佢嗰名, 就只有以下3種可能:
    1) 個故事係做出來, 根本唔會有人可以透過投資達到3年600倍回報
    2) 同中六合彩嘅機會一樣, 只不過係好彩, 根本冇可能多次發生
    3) 分析係假, 靠內部消息先係真

    ps: 如果真係可以靠呢個唔係咁複雜嘅方法, 係短期內賺到咁高嘅回報(甚至已經比巴菲特同彼得·林區最頂峰時嘅回報 仲要高幾倍), 點解冇基金經理 / 專業/業餘 投資者模仿?

    回覆刪除
    回覆
    1. 都似你第二點既情況, 你有冇了解過佢用乜方法既詳情?我覺得係段速多, 跑短跑, 唔似可以跑到馬拉松。佢話幾個partner都用同一個方法, share分析結果, 但就只得佢一個係果段時間有呢個回報。不過都值得睇下, 了解過先可以研究個可行性, 當聽多個故事。

      刪除
    2. 假設佢有方法真係做到3年600倍,點解佢會同止凡佢地講?呢個秘密應該唔會同任何人share

      刪除
    3. 總有呢啲人,但個方法風險太高(輸左果啲唔會出聲,係一種存活者誤差),而且已經唔work 咁share 出黎亦無妨啩?

      相信止凡都係純粹share 下,話呢個世界有呢啲人。就當奇人奇士知道下,再反思一下可以有其他角度去諗呢... (反正本金一萬輸晒都唔痛)

      刪除
  2. 匿名26.2.23

    感覺這些投資手法,不是咱們平凡投資者所觸及,AC博主,是不是寫長文的那位.看得有点兒倦意,實在太長。:)自己友

    回覆刪除
    回覆
    1. 應該唔係, 呢位無寫開blog
      呢篇無詳談佢投資方法, 但以前有分享過

      刪除
  3. 過多3年就賺到36億…?可信性或長期可行性值得懷疑

    回覆刪除
    回覆
    1. 以前分享過佢既投資方法, 有冇睇過? 研究下

      刪除
  4. 這位AC兄是不是 "生活為樂" 的那位?

    回覆刪除
    回覆
    1. 不是
      https://www.cpleung826.com/2018/03/3600.html

      刪除
  5. 回覆
    1. 可以睇下佢個方法
      https://www.cpleung826.com/2018/03/3600.html

      刪除
  6. 匿名4.3.23

    太強👍👍👍 而家慢慢睇吓啲高手 點運作🙏🙏🙏

    回覆刪除

熱門文章