2012年1月27日星期五

恨發達o靚仔借財仔賣衫 [轉載]

止凡真是忍不住要轉載這篇文章, 看到兩個不知天高地厚的小朋友, 又可以說是勇敢, 又可以說是愚昧, 最精彩是最後給黃毅力先生教訓, 說了我想說的話。


恨發達o靚仔借財仔賣衫 [轉載]

有膽量是做生意的先決條件。兩個打了兩年工的後生仔,二十三歲的張經偉(Benice)和周俊謙(Potter),看了《富爸爸窮爸爸》一書後,深受影響。不想再過朝九晚五的打工仔生活,一心想靠創業發達。不過二人手頭上「一個仙」都無,他們膽大過天,不但先各自向家人借了十萬元,繼而碌爆卡、向銀行借萬應錢,甚至年息高達三十釐的「財仔」。左度右借後,以負債四十多萬元為「本」,三個月前生產自家男士服裝品牌uniting, 於旺角潮流特區的一間鋪頭內寄賣。幸運的是,扣除寄賣要繳付的拆賬,uniting每月有三、四萬元盈利。不過這筆「盈利」只能作還債之用。

記者問他們不擔心某個月生意不好,無錢還債?勇字掛心口的他們說:「最多咪破產。」究竟他們的膽識,會帶給他們成功或失敗?本刊找來富利堡車行老闆黃毅力,為兩人指點迷津。

在旺角潮流特區三樓近扶手電梯,一間逾百呎的男士服飾品牌uniting店,櫥窗一邊擺着十多對皮鞋,另一邊牆上掛着西裝和恤衫,吸引了不少年輕人駐足。留鬚根的後生仔Benice見到記者便走出來說:「uniting係我的品牌,由設計至生產都係我同另一個partner Potter負責。呢間鋪嘅老闆本來係賣鞋嘅,我哋只係寄賣喺度。」事實上,要在旺角的商場插旗,平均租金要三至五萬元,兩按一上就最少要十萬元,Benice和Potter不諱言:「我哋手頭沒錢,二按一上都俾唔起,後來透過朋友介紹,知道鞋鋪老闆無心經營呢度,但租約未滿,於是我游說老闆將我哋設計嘅衫喺度寄賣,免付租金,但按照賣出衫的收入,五五分賬。」他們的如意算盤是,即使他們的衫賣不出去,亦不用被租約綁死。

借財仔年息三十

兩人在明愛白英奇專業學校讀設計,Benice亦曾在時裝店initial做過設計師助理,設計服裝對他們來說並不困難,令他們頭痛的就是資金。兩人以「零成本」找到鋪位後,走到深水埗搜購布料,去批發公司問造貨價,發現要做六百多件衫,布料連貨便需八萬元。打工不夠兩年的兩人,戶口只有六千元,Benice試過以公司名義向銀行貸款做生意,但無功而還:「銀行要睇公司兩年財政營運,公司未成立,點會有證明。時間唔等人,諗到就要做﹗」 Potter亦說:「打工每月儲幾千蚊,儲一年先得幾萬蚊,太耐了。」

於是兩人向家人借十三萬元,另一方面Benice又以私人名義向滙豐銀行借了二萬多元萬應錢,「銀行利息較低,還款期長,有得借就借。」Potter見銀包有一張花旗信用卡,信用額達三萬六千元,一次過以現金透支方式「碌爆」。如是者集資了十九萬元,訂造了第一批貨。扣除第一批貨的成本,還有商標註冊、電話費、辦公室租金、請模特兒影相等雜費,已用了十三萬元,加上兩人當時一同報讀了共十四萬元的企業家課程,分期付款每月要還萬多元,令戶口剩下二萬元。一個月後,第一批衫未賣完,資金未回籠,Benice又心急地訂第二批貨,「第一批得六百件咁少,拉勻成本又貴,賣晒都係賺好少。如果有多啲貨,就算賣平啲,貨如輪轉,賺錢會多啲。」第二批貨逾一千件,成本需二十萬元,須預先繳付訂金六千元,餘數要在聖誕節前找清。於是Potter再向家人借八萬元,Benice見銀行私人貸款利息三釐,還款期一年,於是分別再向滙豐、花旗銀行貸款十一萬元,「銀行要三個月薪金證明,我咪蓋公司印出糧俾自己,存三萬蚊入去,銀行咪借俾我囉,真係好蠢。」最後一批秋冬貨到齊後,批發商要求他們於四日內找清尾數四萬元,他們還差兩萬元才夠支付,但銀行貸款最快兩個星期才批,Benice打聽下知悉借「財仔」兩日搞掂,他和Potter於是向安信財務借了五萬元,利息三十釐,「問財仔借錢一啲都唔恐怖,負債使咩驚﹗我恨不得負債越長越好,李嘉誠負債最多,但最有錢又係佢。」Benice輕佻地說。

舊債未清搞新計劃

借下一大筆錢生產服裝,要谷銷路賺錢才能有錢還債。uniting恤衫定價六百元,褸則八百元,毛利約七成。第一個月銷路差,試過一天賣不出一件,只有三萬元生意額,Benice便想出「絕招」吸客,「我將價錢牌改成一千蚊當六折平賣,六百蚊有一件恤衫,其實都無減過價,但好多人信。」Benice笑說。現時每日平均賣出五件衫,生意額達七萬三千元,但據寄賣協議,他們要將生意額一半分予店主,換言之,只有三萬五千元落袋,但統統要拿去還錢,現每月各項負債的最低還款額是一萬四千元。只是第一個月有盈餘,舊債又未清,他們已迫不及待行下一個計劃。現時寄賣的鞋店月租四萬元,uniting交予鞋鋪老闆的三萬多元,幾乎接近一個月租金,並不划算,Benice遂想頂手該鋪,「依家寫緊計劃書向朋友融資三十萬,頂手後再發展網上生意、搞飲食。最近識咗一間製衣廠的太子爺,計劃六月份合作做男裝賣去澳洲、東南亞。」

恨做老闆,純因二人讀了《富爸爸窮爸爸》一書。Benice本來在initial做設計師助手,每月有七千元薪金,「返朝十至六,但個個OT到凌晨兩點,又唔係有嘢做,只係因為氣氛係咁。」他受書本內容影響,不想為一份糧作金錢的奴隸,於是半年後辭職。碰巧同讀設計系的Potter亦深愛此書,二人更一起報讀《富爸爸》系列的企業家培訓課程,為期僅一星期,「時間咁短,但改變咗我的金錢觀。」自此他們「富爸爸」上身,Benice還在facebook組織網友,到咖啡室玩《富爸爸》作者發明的「現金流」遊戲。「《富爸爸》作者發明呢個遊戲好聰明,好似玩大富翁咁,但裡面的情境更現實,教你點樣理財,投資房地產、做生意賺錢,唔好靠人工,都可以應付結婚生仔等支出,必要時借錢負債無所謂,現實生活不過係一個現金遊戲。」他們重複書中提到解決問題的積極思想,只想生意成功,完全沒危機感,「我當正自己係企業家,成日諗還唔到錢點算,不如諗吓第日發達點仲好啦。」Benice說。

零成本搞年宵

近日維園年宵,Benice把uniting定位為「文化社企」,得以在攤位擺檔,賣手作相架、環保袋,租金由政黨贊助,費用全免,「我改咗公司業務性質,唔只係賣衫,又叫藝術平台,個名越虛越好,可以同唔同的團體合作。我要做有錢人,當業務上軌道後,繑埋手都有錢。」Potter自言家人疼愛他,小時曾學壞吸毒,經常伸手問父母拿錢,爸爸在園藝公司打工,媽媽在惠康做店員,家住上水村屋,設備簡陋,「我四年前信咗耶穌,學乖唔去玩,爸媽見到我讀書做生意,我話攞錢佢哋即刻俾。」Benice出身單親家庭,「阿媽覺得欠咗我,俾唔到完整家庭,佢成日話我生性,俾埋積蓄我做生意。」雖然向家人借的錢,還款無期,但銀行、財仔卻有限期,「我有咩輸唔起,還唔到錢最多咪破產,當學嘢,《富爸爸》個作者都試過破產,咪由政府限制你唔准坐的士,每月限額消費之類。」Benice不知天高地厚地說。

開業資料(10/2011)

租金*$1,500入貨$80,000裝修$10,000雜費$25,000總投資$116,500*深水埗辦公室

營業資料(12/2011)

總營業額@$82,054拆賬#$36,687租金$1,500入貨*$0雜費$2,000盈利$41,867@除寄賣,還包括朋友幫襯。#店鋪營業額$73,374,分賬一半予店主付鋪租、人工。*入貨$200,000,全以借貸繳付。

壹點意見

富力堡車行老闆黃毅力,與Benice及Potter會面,知悉這兩個後生仔沒有任何積蓄,卻於短期內負債逾四十萬元,更視破產為無物,立刻把他們當頭棒喝。黃(黃毅力) B(Benice) P(Potter)

財仔息高

黃:點解借咁多錢?你啲錢使咗去邊?B(理直氣壯):攞去入貨,有幾萬蚊攞嚟作生活費。黃:知唔知過期罰款利息幾多釐?罰款手續費幾多錢? B(停頓五秒,疑惑):嗯……我哋之前有計過嘅,但唔記得。黃(怒氣):未搞清楚條款就走去借錢?單計VISA卡,年利息36釐,過期還款最高可以去到 59釐。財仔還唔到要「起釘」。你淨係識計最低還款額,過咗期還款仲有手續費,利息好似雪球咁滾大。

破產回頭難

黃:咁計法,你件衫毛利要幾多先還到債?B(呆望,無語):產品毛利好似三至四成,但因為寄賣,要拆佣俾人,兩年應該可以收支平衡。黃(怒氣):賺幾錢都唔知,你哋知唔知,差一萬蚊還唔到都要破產。係咪以為破產咪破產,再嚟過囉?B:成功必須經過失敗嘅。我哋唔會諗失敗,會係失敗之前諗點樣解決問題。黃(質疑道):照咁睇,你覺得自己一定成功。做生意賺硬o架?你哋做嘢點可以唔諗downside。破產後出境要申報,同軟禁無分別,亦等於誠信破產,想打工?到時連考個保險經紀牌都難。你哋兩個準備攬住一齊死。

別沉迷書本

B、P(對望,B笑笑口):我哋認為打工無出息,後生仔應該及早創業。我哋有好多已經落實的計劃,準備做埋飲食、網上生意,有人應承集資,可以創造更多商機和金錢。

黃:你哋太沉迷《富爸爸 窮爸爸》,但唔好上晒腦,呢度係香港,唔係美國,嗰套未必啱用。打工有咩問題?我都打工十幾年先創業。除非有人打本俾你,如果唔係要先打工儲番嚿本先,唔好一開波爭人周身債,神憎鬼厭。

黃毅力寄語:

1.停止借錢,看清楚利息條文,用試算表計算公司何時才能收支平衡,還清債務。

2.分清兩人的銀行公司賬項,不要讓是但一方可隨便拿錢自用或還債,最終只會一拍兩散。3.停止未發展的計劃,每個計劃幾乎要花一百萬元。賣衫仍未知何時收支平衡,不如先專心做好一件事。Bernice及Potter認為黃毅力建議快狠準,「我哋做生意對數字不敏感,係唔啱,返去會計好條數。」不過,他兩人堅持借財仔無錯:「後生仔創業係無本錢,只要運用得好,一樣可以成功。打工或創業,只係個人性格選擇。而且我哋唔會停止手上計劃,會錯失商機,做生意太理性唔好。我哋信得過大家,合作係無問題的。」

11 則留言:

  1. 匿名27.1.12

    謝謝, 可以作為自我警惕. (財務自由瘋子)

    回覆刪除
  2. 雖然佢地對《富爸爸 窮爸爸》斷章取義/一知半解 (財仔同現金透支絕對係bad debt), 但行動力真係值得參考.

    回覆刪除
    回覆
    1. 係呀, 可能佢地好快會經一事、長一智, 大把前途

      刪除
  3. 很想知道 他們現在那樣? 借財仔 信用卡 利息30多釐 賺賺埋埋都唔夠比息

    回覆刪除
    回覆
    1. 我也很想知道,祝他們好運。

      唐老鴨兄突然之間在這裡留言,你在回看舊文章嗎?

      刪除
    2. 是 從2007年追看 追到了2012年

      刪除
    3. 原來如此,加油,一路給意見吧。

      刪除
    4. 可以一路給意見? 我見你有一文中提及 {請客}一文 但我又找不到那一篇文章是叫{請客}

      我想找這篇文章看看

      刪除
    5. 即有意見隨時留言交流的意思。

      如無記錯,《請客》應該是指小時候中文科的一篇文章,是中國人的一種文化,如在香港讀書的大概會有印象,不妨找找。

      刪除
  4. 原來《請客》 係中文科的一篇文章
    我本來以為係你寫的文章來 讀書不多 不好意思

    我自己也很喜歡請客 在朋友聚會當中也很喜歡埋單

    回覆刪除
    回覆
    1. 記得《請客》一文的大意不太認同中國人的請客文化,你有時間不妨找來看看吧。

      刪除

熱門文章